“यो जेठ महिना त पूरै निषेधाज्ञा जारी भयो, सवारी चाप नभएपछि मानवीय क्षति पनि कम हुने भो,” थापाले भने, “मंसिर महिनामा मानिसको चहलपहल र सवारीचाप पनि बढ्यो । यो महिनामा भिजिविलिटी कम देखिने रहेछ ।”

सबैभन्दा बढी मृत्यु र घाइते भित्री सडकमा

चालु आर्थिक वर्षको जेठसम्म सबैभन्दा बढी मृत्यु र घाइते भित्री सडकमा भएका छन् । कार्यालयका अनुसार ११ महिनाको अवधिमा भित्री सडकमा ५३ जनाको मृत्यु भएको छ भने २१८ जना घाइते भएका छन् ।

यस्तै सबैभन्दा कम मृत्यु र घाइते सहरीखण्डका सडकमा भएका छन् । सहरी सडकखण्डमा यो अवधिमा सातजनाको मृत्यु भएको छ भने ९२ जना घाइते भएका छन् । यस्तै, दोस्रो बढी सवारी दुर्घटनामा पर्ने सडकखण्ड पूर्व–पश्चिम लोकमार्ग रहेको छ ।

जहाँ एघार महिनाको अवधिमा ३९ जनाको मृत्यु भयो भने १७५ जना घाइते भए । कार्यालयले दिएको तथ्यांकानुसार यस अवधिमा नारायणगढ–मुग्लिन सडकखण्डमा सडक दुर्घटनामा १३ जनाको मृत्यु र १३६ जना घाइते तथा पृथ्वी राजमार्गमा आठजनाको मृत्यु र २५ जना घाइते भएका छन् ।

कार्यालयका प्रमुख थापाका अनुसार पछिल्लो समय भित्री सडकखण्डहरु विस्तार हुँदै जाने र यातायातको पहुँच बढ्दै गएकोले भित्री सडकमा बढी दुर्घटना भएर मानवीय क्षति हुने गरेको छ । “भित्री सडकमा लापरबाही पनि भयो । ट्राफिक प्रहरीको पहुँच पनि कम भयो ।

ब्लाइन्ट स्पट पनि भित्री सडकमै छ,” उनले भने । सहरी सडकखण्डमा ठूला सडक, ट्राफिक चेकिङ बढी, सीमित गति र चालक आफैँ संयमित हुने गरेकोले पनि मानवीय क्षति कम हुने गरेको उनको भनाइ छ ।

सबैभन्दा बढी सवारी दुर्घटना पनि भित्री सडकमै

चालु आवको ११ महिनाको अवधिमा चितवनमा सबैभन्दा बढी दुर्घटना भित्री सडकमा भएको पाइएको छ । कार्यालयको तथ्यांकानुसार भित्री सडकमा सबैभन्दा बढी १३४ र सबैभन्दा कम २० वटा सवारी दुर्घटना पृथ्वी राजमार्गमा भएको छ । यस्तै, पूर्व–पश्चिम लोकमार्गमा १२३, नारायणगढ–मुग्लिन सडकखण्डमा ६१ र सहरी सडकखण्डमा ५९ वटा सवारी दुर्घटना भएको तथ्यांक छ ।

प्रमुख थापाले राजमार्ग र सहरी क्षेत्रका सडकभन्दा भित्री सडकहरु साँघुरो, कमजोर संरचना र लापरबाही बढी हुने गरेका कारण बढी दुर्घटना हुने गरेको बताए । “पछिल्लो समय मापसे गर्ने, चेकिङ छल्ने र लाइसेन्सविना सवारी–साधन चलाउनेले भित्री सडक बढी प्रयोग गरेको पाएका छौँ । उनले भने, “यस क्षेत्रमा हाम्रो जनशक्ति र ट्राफिक चिह्न पनि छैनन् ।” सामान्य अवस्थामा चितवन भएर दैनिक झन्डै २५ हजार सवारी–साधन ओहोरदोहोर गर्छन् ।