हेटौंडा  ।  प्राकृतिक सम्पदा र वन्यजन्तु संरक्षणको लागि स्थापना भएको राष्ट्रिय निकुञ्ज नै विकासको बाधक बन्न थालेपछि सर्वसाधारण आक्रोशित भएका छन् । पर्सा राष्ट्रिय निकुञ्ज अन्तर्गत पदमपोखरी सेक्टर लामिटारले हेटौंडा–१९ नम्बर वडा नेवारपानीको हिलाम्य बाटोमा भैरहेको ग्राबेलिङ कार्यमा अवरोध सृजना गरेको छ । वडा अध्यक्ष नरनाथ सुवेदी ‘नवराज’को उपस्थितीमा सानान्टारस्थित खोलाबाट ग्राबेल निकालेर हिलो बाटो पुर्ने काम भैरहेकोमा आरक्षको टोलीले अवरोध सृजना गरेको हो ।

निकुञ्जको लामिटार पोष्टका सहायक संरक्षण अधिकृत मिथलेश महतोले सेनासहित उपस्थित भएर ग्राबेल खन्न प्रयोग भएको ट्याक्टर र जेसीवी रोक्दै काम बन्द गर्न निर्देशन दिएका थिए । वडा अध्यक्ष सुवेदीले हिलाम्य भएको बाटो मर्मतका लागि उपमहानगरपालिकाको अनुमतिसहित उपमहानगर क्षेत्रकै बगरबाट ग्राबेल उठाउने काम भैरहेको प्रमाण देखाउँदा पनि आरक्षको टोलीले मेसिन र ट्याक्टर नियन्त्रणमा लिन खोजेपछि झडपको अवस्था समेत सृजना भएको थियो ।

विकासको काममा अवरोध सृजना गरिएको भन्दै सर्वसाधारणले आरक्षका कर्मचारीको विरुद्धमा नाराबाजी समेत गरेका थिए । ‘यहाँको क्रसर र अन्य ठेकेदारहरुले मनलाग्दी रुपमा खोला खन्दा नदेखेको झैं गर्ने आरक्षले हामीले उपमहानगरपालिकाको स्वीकृतिसहित विकास निर्माणको काम गर्न खोज्दा रोक्ने काम गरेको छ । आरक्षको एरियामा उत्खनन् गरेको पनि होइनौं । ट्याक्टर र जेसीवीको चावी थुत्ने काम भएको छ’, सुवेदीले भने, ‘पछिल्लो समय आरक्षको निकै दादागिरी भएको छ ।

यस्तै पारा हो भने पर्सा राष्ट्रिय निकुञ्ज र यसका कर्मचारीको मनलाग्दीको विरुद्ध सर्वसाधारण आन्दोलित नहोलान् भन्न सकिन्न ।’ यस बिषयमा थप विवाद भएपछि आरक्षको टोलीले आधाभारबाट सेनाको टोली साथै ईलाका प्रहरी कार्यालय मनहरी र नेवारपानीबाट प्रहरीको थप टोली राप्ती बगरमा उतारेको थियो । बगरमा सर्वसाधारणको समेत उत्तिकै भिड लागेको थियो ।

आरक्षको टोलीले ग्राबेल खन्न प्रयोग भएको सवारी लामिटार पोष्टमा लैजाने र छलफल गर्ने भन्दै लिँडेढिपी गरिरहेको अवस्थामा ईलाका प्रहरी कार्यालयका प्रहरी निरीक्षकले ईलाका प्रहरी कार्यालयमा नेवारपानीमा सवारी राखेर छलफल गर्ने भनेपछि वडा अध्यक्षसहित सर्वसाधारणहरु बगरबाट हिँडेका थिए ।

ग्राबेल निकाल्न र बोक्न प्रयोग गरिएको सवारी ईलाका प्रहरी कार्यालय नेवारपानीमा राखिएको छ । यस बिषयमा प्रतिकृया लिन खोज्दा लामिटार पोष्टका सहायक संरक्षण अधिकृत महतोको मोबाइलमा सम्पर्क हुन सकेन । पर्सा राष्ट्रिय निकुञ्ज मध्यवर्ती व्यवस्थापन समितिका अध्यक्ष पदम तितुङले समन्वयको अभावमा समस्या सृजना भएको प्रतिकृया दिए ।

आरक्षको टोलीले चावी थुत्न गएको क्षेत्र निकुञ्जको हो त ? भन्ने प्रश्नमा उनले सिमांकनको एकीन नभएको प्रतिकृया दिए । विकासको काममा आरक्षको टोलीले पैसाको वार्गेनिङ गर्ने गरेको र सर्वसाधारणलाई विभिन्न बाहनामा दुःख दिने गरेको स्थानीयको आरोप छ । आरक्षको मनलाग्दी बढेको भन्दै पदमपोखरी र हाँडीखोला क्षेत्रलाई राष्ट्रिय निकुञ्जबाट हटाउनुपर्ने आवाज समेत उठ्न थालेको छ । यसका लागि पदमपोखरीका अर्जुन तिवारीको संयोजकत्वमा यसअघि नै संघर्ष समिति समेत बनेको छ ।

हेटौँडामा ४२ किलो गाँजासहित दुई भारतीय नागरिक पक्राउ

बागमती प्रदेशले संघिय सरकारसँग पुनर्निर्माणका लागि एक अर्ब अनुदान माग्ने

कारले स्कटिङ् गर्दै ल्याएको एक सय ६२ किलो गाँजासहित दुई जना पक्राउ